Чÿкĕн 26-мĕшĕнче Шупашкарти Çеçпĕл Мишши ячĕллĕ кил-йыш вулав центрĕнче «Асамлăх çулĕ» кĕнекен хăтлавĕ (презентацийĕ) иртнě. Кĕнекене 2008-2009 çулсенче Chuvash.Org сайт урлă ирттернĕ литература ăмăртăвĕсенче малти вырăнсене йышăннă шкул ачисемпе вĕрентекенсен хайлавĕсенчен калăпланă. 2008 çулта фантастика конкурсĕ, 2009 çулта — «Халап хапха тăрринче» юмахсен конкурсĕ иртнĕ. Çак конкурссене Николай Плотников Chuvash.Org сайтăн тĕп администраторĕпе Çĕрпÿ  районĕнчи Михайловка шкулĕн директорĕ Владимир Андреев йĕркеленĕ.

Николай Плотников конкурс ирттерме çăмăл марине, уйрăмах кĕнеке кăларма йывăр пулнине палăртрĕ. Анчах та çак ĕçе хăй кăмăлпа, юратса пурнăçланине пĕлтерчĕ. Конкурс вăхăтĕнче пухăннă ĕçсем хушшинче малти вырăнсене йышăннă хайлавсене кĕнекен халăх патне çитерме хутшăннă ытти çынсем те тухса сăмах каларĕç. «Асамлăх çулне» ÿкерчĕкĕсемпе илемлетме Çĕрпÿ районĕнчи Çырмапуç шкулĕнчи «Ăсталăх кĕперĕ» кружока çÿрекен ачасене явăçтарнă сăнарлă ăсталăх урокĕсене вĕрентекен, Çеçпĕл Мишши премийĕн лауреачĕ Станислав Юхтар кĕнекене капăрлатас ĕç мĕнлерех пулса пыни пирки кĕскен пĕлтерчĕ. «Асамлăх çулĕ» кĕнекен дизайнне тунă каччă, «Тăван ен» хаçат дизайнерĕ Виктор Бычков, пултаруллă вĕренекенсемпе вĕрентекенсене мухтарĕ, малашне те çитĕнÿсем тума сунчĕ. Чăваш çамрăкĕсен «Сăвар» пĕрлешĕвĕн хастарĕ, кĕнеке кăларма укçа-тенкĕпе пулăшнă Патăрьел тăрăхĕн каччи Эдуард Николаев та конкурс çĕнтерÿçисен ĕçне халăх патне çитерес ĕçе хавхаланса, кăмăлтан хутшăннине палăртрĕ, хайлав авторĕсене çĕнтернĕ ятпа саламларĕ.

Паллă çыравçă, Çеçпĕл Мишши ячĕллĕ премии лауреачĕ Лидия Сарине хăтлава пухăннисене тав турĕ. Конкурссем йĕркелесе кĕнеке кăларас ĕçе арçынсем хутшăнни уйрăмах сăвăçăн кăмăлне кайнă. Вăл çак пархатарлă ĕç малалла аталанасса шаннине, шкул ачисемпе вĕрентекенсене хăйсен пултарулăхне кĕнекен кăларса нумай вулакан патне çитерме май туса пани питĕ ырă ĕç пулнине пĕлтерчĕ. Хальхи вăхăтра хайлав пичетлес ĕç тăкаклă, хаклă пулнине шута илсен маттур арсене пушшех те мухтамаллине палăртрĕ.

Чăваш халăх артисчĕ, паллă юрăç Иван Христофоров пултаруллă сăвăçăсемпе юмах-халап ăстисене мухтарĕ, ăнăçу сунчĕ, халăх юратакан хитре юрăсем шăрантарса уява илемлетрĕ.

Хăтлавра Чăваш чĕлхи тĕпчевçи, «Раççей ялĕсен энциклопедийĕ» (Мускав хули) ăслăлăх, культурăпа çут ĕç обществин регионти (Чăваш Енри) уйрăмĕн секретарĕ, Чăваш халăх сайчĕн ĕçне активлă хутшăнакан Сосаева Алина Аркадьевна, тĕрлĕ шкулсенчи вĕрентекенсем т. ыт. те тухса калаçрĕç. Хăтлава хайлавсен авторĕсем тата ăна кăларма пулăшнă пур çын та килсе çитнĕ, республикăн нумай кĕтесĕнчи шкул ачисемпе вĕрентекенсем йышлăн хутшăннă.

Елчěк районěнчен  8 вěренекенпе 1 вěрентекен çěнтерÿçěсен йышне лекнě. 2009 çулта  «Халап хапха тăрринче» юмахсен конкурсĕнче пирěн шкулта  7 кл. вěренекен Максим Левый палăрнă.

Хăтлава килнисене пурне те конкурссене йĕркеленĕ Николай Плотников алă пуснă «Асамлăх çулĕ» кĕнеке асăнмалăх парне пулчĕ. Юлашкинчен«Асамлăх çулĕ» кĕнекен хăтлавне хутшăннисем  пурте пěрле сăн ÿкерěннě.