хаçат парнисемшĕн пынă çивĕч те хĕрÿ ăмăртăва кăçал Раççейри пилĕк регионтан килнĕ 150 кире пуканçă хутшăнчĕ. Ăна чăваш халăх хаçачĕ тухма пуçланăранпа -105, Чăвашпотребсоюза йĕркеленĕренпе 90 çул çитнине халалланă.
Йăлана кĕнĕ турнира савăнăçлă лару-тăрура уçнă чухне йывăр атлетсене «Хыпар» Издательство çурчĕн директорĕ-тĕп редакторĕ А.П.Леонтьев, ЧР Патшалăх Канашĕн депутачĕ, Шупашкарти коопераци институчĕн ректорĕ В.В.Андреев, ЧР Президенчĕн канашçи, Вăрнарти аш-какай комбиначĕн генеральнăй директорĕ Ю.А.Попов, ЧР Патшалăх Канашĕн депутачĕ, Чăваш патшалăх университечĕн проректорĕ О.Н. Викторов, Раççей спортăн тава тивĕçлĕ мастерĕ, XXVIII çуллахи Олимп вăййисен кĕмĕл призерĕ О.В.Иванова, СССР спортăн тава тивĕçлĕ мастерĕ, парашютпа сикес енĕпе СССР, Европа тата тĕнче рекорчĕсене 38 хут çĕнетнĕ, 5 хут тĕнче чемпионки пулнă М.П.Костина, Раççей спортăн тава тивĕçлĕ мастерĕ, тĕнче чемпионки О.Н. Егорова, кире пуканĕ спорчĕн республикăри федерацийĕн президенчĕ, вăлах ăмăртусен тĕп судйи Ю.М.Карпов тата ыттисем те ăшшăн саламларĕç, çĕнĕ çитĕнÿсем сунчĕç. Кире пуканçăсен тупăшăвне ирттерме çулленех хастар хутшăнакансемпе пулăшакансен пĕр ушкăнне ятран çырнă Кубокпа чысларĕç.
Спортсменсем кăçал та çĕнĕ рекордсемпе савăнтарчĕç. Уйрăмах хĕрсем, хĕрарăмсем тĕлĕнтерчĕç. Вĕсене иртнĕ вырсарни кун Раççейре Амăшĕ кунне уявлани те хавхалантарчĕ.
Йывăр та çивĕч кĕрешÿре пĕрремĕш вырăна Чăваш патшалăх ял хуçалăх академийĕн команди йышăнчĕ. Хастар йыша ăмăртăва тĕнче чемпионĕ Б.Н.Глинкин хатĕрленĕ. Елчĕк районĕпе Улатăр хулин командисем - иккĕмĕшпе виççĕмĕш вырăнсенче. Абсолютлă чемпион ятне арçынсенчен Сергей Соловьев, хĕрарăмсенчен Екатерина Козлова /иккĕшĕ те Елчĕк районĕнче çитĕннĕ/ çĕнсе илчĕç.
